تاریکایی ئاسۆی ژیانتی داگیرکردووە!

تاقیکردنەوەیەکی چەند قورسە کاتێک دەکەویە بارودۆخێکی وا لە ژیانت هەرگیز چاوەڕوانی نەبووی، ئەو ساتەی کەس بە حاڵت نازانێ تەنها خوای گەورە نەبێ، ڕووناکیەکانی ژیانت هەموو کوژاونەتەوە، تاریکایی ئاسۆی ژیانتی داگیرکردووە، نائومێدی هەموو ڕۆژێک دەیەوێ چەندین جار بتخنکێنێ، پێکەنینەکانی دەورووبەرت چەند لا نامۆ دەبێ، ڕۆژ لە دوای ڕۆژ فشارەکان لەسەرت چەند قورستر دەبن، سەرگەردانیەکانت چەند ئاڵۆز دەبن، حەپەساویت هیچ ڕێگایەک نادۆزێتەوە بۆ وەسف کردن، داماوی و بێتاقەتیت هەموو سنورەکی بەزاندووە، زۆر بە توندی تووشی هەستکوێری بووی؛ لەو کاتەدا تاقیکردنەوەکە چەندان جار سەختتر دەبێ کاتێک گومانی باش نابەی بە خوای گەورە کە ئەو ڕێگای ڕزگاربوونی نیشاندای، ئەو زۆر ئاگای لێت دەبێ، دەتپارێزێ، ئەوەی داوای دەکەی پێت دەبەخشێ!

کاتێکیش اللە هیدایەتت دەدات چەند لە نزیکەوە هەست دەکەی کە اللە بە حاڵت دەزانێ، ئەو ئاگای لێت دەبێ، تەنها بیرکردنەوە لە بەخشندەیی و ڕەحمی خوای گەورە لوتکەی دڵدانەوەکان دەبن بۆت، بۆت گرنگ نیە و ناتەوێ کەس بە حاڵت بزانێ، ناتەوێ کەس بەزەیی پێتدابێتەوە، کەس ئاگای لێت بێت، دەرگای هیوا و ئومێد دەکرێتەوە، هەموو شەوێک لە دەرگای ئومێدی ئەو دەدەی، زۆر بە هیوای ئەوەی دەرگاکە لە ڕۆژدا بەڕووتدا بکرێتەوە، کاتێک هێندە گومانی باش بە خوا دەبەی تاقیکردنەوەکە چەند ئاسان دەبێ، هەموو قورساییەکان زۆر بچوک دەبنەوە، بەو تاقیکردنەوەیە دڵخۆش دەبی و چاوەڕوانی پاداشت دەکەی، کاتێک هێندە گومانی باش بە خوا دەبەی کە هەرگیز وا گومانی باشت بە کەس نەبردووە، هێز و وزەیەکی وات پێدەبەخشرێ تا یەک هەناسەت مابێ، داوا دەکەی، داوای ڕزگاربوون!