ئەی گوڵە گەنمی وشکەوەبوو!

ئەی گوڵە گەنمی وشکەوەبوو، بخەوە تا جوتیارە بە وەفاکە دێت، سەردانت دەکات، تۆ دەبیە میوانی ئەو، ئەویش دەبێتە میوانی تۆ.

ئەی گوڵە گەنمی وشکەوەبوو، سەرت کزبکە با دەم و چاوی زۆردارەکان نەبینی، ئەوانیش نزیک نەبنەوە لێت، دەست نەدەن لە بەرهەمی یەک ساڵەت.

ئەی گوڵە گەنمی وشکەوەبوو، ئارامبگرە هێشتا زیاتر، زۆر زیاتر پشوو بدە، گومانت نەبێ تینی تیشکی خۆر ناتوستێنێ.

ئەی گوڵە گەنمی وشکەوەبوو، بمێنەوە لە شوێنی خۆت، سروشت جوانتر بکە، ژینگەی ئەو ناوچەیە بکە بە هیوا، قات و قوڕی بخنکێنە.

ئەی گوڵە گەنمی وشکەوەبوو، بە با و بۆڕان نەکەویە خوارەوە، لەسەر بنجی خۆت بمێنەوە تا ئەو کاتەی خاوەنەکەت سەردانت دەکات، لەگەڵ خۆی دەتباتەوە ماڵی خۆی.

ئەی گوڵە گەنمی وشکەوەبوو، هەموو ڕۆژێک سڵاوت لێدەکەم، کە بە ڕوویەکی خۆش بەسەر ڕێگاکان زەنگی موژدە و هیوا بەبێ دەنگی دەچرپێنی بۆ نوستوو و بێ ئاگاکان.

ئەی گوڵە گەنمی وشکەوەبوو، هیوای برسیەکان، با چاوبرسی و چاوچنۆکەکان ڕووی بەخشندەیی تۆ نەبینن، سکی منداڵە برسیەکان تێر بکە، چاوەکانیان گەش بکەوە بە ڕووخسارە جوانەکەت.

ئەی گوڵە گەنمی وشکەوەبوو، تۆ چ تاسانێکی بۆ بەخشندەکان، کاتێک یەک دەنکی، دەبی بە سەدان گوڵە گەنم.

ئەی گوڵە گەنمی وشکەوەبوو، مامۆستای هەمووان، هەموو ساڵێک بگەڕێوە، سیمای جوانی خۆتمان نیشان بدەوە، وانەکانمان دووبارە فێربکەوە، بیرمان بخەوە.

ئەی گوڵە گەنمی وشکەوەبوو، هەروا بە ڕیز بوەستە لەگەڵ هاوسێکانت، لە کۆمەڵی خۆت جیامەبەوە، هێزی زیاترمان نیشان بدە، فێری جێگیری و ئارامی و بەخشندەیی زیاترمان بکە.

ئەی گوڵە گەنمی وشکەوەبوو، بە کزە بایەکان چەند جوان بەلایەکدا ڕووی خۆت وەردەگێڕی، بەڵام هەرگیزی ناکەوی. 

ئەی گوڵە گەنمی وشکەوەبوو، مەهێڵە کەس نزیک بێتەوە بۆ ناو ماڵت، بە قاچەکانیان پانت بکەنەوە، با کەس نەتخاتە ژێر پێ و بن پێی خۆی، تۆ هەر سەربەرز و پایەدار و ڕوو لە گەشە بە.

ئەی گوڵە گەنمی وشکەوەبوو، تخوا وەرە خەونمەوە هەموو شەوێک، با لەسەر ڕێگای شوێنی کارەکەشم هەردەم تۆ بەبەرچاومەوە بی، هەموو ڕۆژێک بتبینم.

ئەی گوڵە گەنمی وشکەوەبوو، چەند جوان خۆت داپۆشیوە، وانەکانی داپۆشراویمان فێربکەوە، با شەرم و حەیامان بگاتە لوتکە، تۆش هەمیشە مامۆستامان بە.